Renis Dobra është personi që shikoni në foto dhe vendi ku ndodhen oficerët, është gremina buzë liqenit të Shkopetit ku ai u gjet i pajetë nga një banor i zonës. 23 vjeçari nuk ishte kthyer në shtëpi prej orësh dhe babai kishte shkuar të bënte kallëzim në Polici.
Menjëherë efektivët e Matit kanë nisur kërkimet për të riun dhe janë njoftuar nga një banor i zonës për një trup të pajetë pranë liqenit. Personi, ka thënë se viktima kishte një shenjë plumbi në trup.
Kur efektivët kanë mbërritur në vendngjarje, ata kanë konstatuar dhe se në zonën e qafës kishte mavijosje çka ka ngjallur dyshime se Renis Dobra edhe mund të jetë mbytur me litar. Për shkak të kompleksitetit të rastit, në Mat kanë shkuar ekspertët kriminalistikë nga Tirana.
Dy janë shkaqet që mendohet se kanë çuar në këtë ngjarje të rëndë; një prishja e pazareve të drogës për shkak se në zonën përreth ka pasur raportime dhe ndërhyrje në parcela me kanabis; ose xhelozi për shkak të një marrëdhënie dashurie.
Babai i Renisit është paraqitur në Komisariatin e Matit dhe ka kërkuar që të nisnin kërkimet sepse i biri 23 vjeçar nuk ishte kthyer në shtëpi. Familjarët fillimisht kanë menduar se djali ishte arrestuar, por kur kanë shkuar në Polici kanë parë që Renis Dobra nuk ishte aty.
“Mbrëmjen e djeshme, është paraqitur në Komisariatin e Policisë Mat, shtetasi R. D., i cili ka kallëzuar se djali i tij, shtetasi R. D., 23 vjeç, nuk ishte kthyer në banesë. Shërbimet e Policisë kanë nisur menjëherë kërkimet për gjetjen e 23-vjeçarit.
Pas disa orësh kërkime, shërbimet e Policisë kanë gjetur trupin e pajetë të 23-vjeçarit, pranë liqenit të Shkopetit, ndërsa automjeti i tij dyshohet se ka rënë në liqen”, thuhet në njoftimin e Policisë së Shtetit për këtë ngjarje.
