Pesë zyrtarë policorë janë arrestuar mbrëmjen e kësaj së hëne në Kosovë, nën dyshimin për përfshirje në vdekjen e një 27-vjeçari në Lipjan.
Ngjarja ka ndodhur në orët e para të 7 korrikut, në rrugën “Haradin Bajrami”, ku Agron Zejnullahu humbi jetën gjatë ndërhyrjes policore për arrestimin e tij. Në operacionin policor ishin të përfshirë një rreshter dhe katër zyrtarë të tjerë, të cilët tashmë janë pezulluar nga detyra.
Inspektorati Policor i Kosovës (IPK), në bashkëpunim me Prokurorinë Themelore të Prishtinës, ka nisur hetimet për rastin.
“Pas intervistimit të zyrtarëve policorë dhe administrimit të dëshmive të mbledhura gjatë hetimeve, të gjithë pesë zyrtarët janë arrestuar si të dyshuar. Me vendim të prokurorit, ndaj tyre është caktuar masa e ndalimit prej 48 orësh”, konfirmoi IPK.
Hetimet pritet të vazhdojnë me një sërë veprimesh të tjera për të zbardhur plotësisht rrethanat e incidentit, përfshirë edhe rezultatet e ekzaminimeve mjeko-ligjore.
Sipas Policisë, ndërhyrja erdhi pasi 27-vjeçari dyshohej se ishte nën ndikimin e alkoolit dhe po sulmonte qytetarë në rrugë. Ndërkohë, familja e viktimës ka fajësuar policinë për vdekjen e Zejnullahut.
