Blegtorët në zonën e Cakranit të Fierit po përballen me vështirësi të mëdha për të mbajtur gjallë aktivitetin e tyre.
Kostot e larta të punimit të tokës, çmimi i naftës, mungesa e subvencioneve dhe konkurrenca e pandershme po i vënë në vështirësi. Ramazan Subashi nga fshati Varibop është një prej fermerëve që ka ndërtuar me mund një fermë blegtorale me 18 lopë dhe 10 viça. Për t’i siguruar ushqimin, ai punon rreth 50 hektarë tokë te marre me qira, të cilat i ka mbjellë me misër, jonxhë dhe foragjere të tjera.
“Vetëm 7 hektarë i kam me misër, pjesa tjetër është jonxhë, të gjitha për bagëtinë. Nafta është shumë e shtrenjtë, plehrat kimike gjithashtu. Pa mbështetje nuk mund të ecim përpara”.
Megjithëse punon një sipërfaqe të madhe toke, Ramazani tregon se për shkak të problemeve me dokumentacionin dhe mungesës së certifikatave të pronësisë, përfiton subvencione vetëm për një pjesë të vogël të saj.
“Nga 50 hektarë, më njohin vetëm 10 për subvencionim. Tokat janë pa dokumenta, pronarët kanë ndërruar jetë, ose janë pa certifikata. Ligjet duhet të ndryshojnë që fermeri të përfitojë atë që i takon.”
Një tjetër shqetësim për fermerët është dhe çmimi i ulët i qumështit, i cili nga 700 lekë për litër ka rënë në 650 lekë, ndërkohë që tregu dominohet nga qumështi i importuar, kryesisht nga Serbia.
Ramazani thotë se në këto kushte, pa përkrahjen e shtetit dhe pa një politikë të qartë për bujqësinë dhe blegtorinë, ky sektor do të mbetet pa të ardhme dhe pa trashëgimtarë./TCH
