Fatjon Gjonaj, shqiptari i akuzuar si kreu i një bande të përfshirë në trafik ndërkombëtar kokaine, hashashi dhe marijuane, u ekstradua në Itali.Gjonaj arriti në aeroportin Fiumicino rreth orës 18:15 dhe u dërgua menjëherë në burg, në dispozicion të autoriteteve gjyqësore italiane. Ai ishte arrestuar më 3 qershor në Dubai.
Hetimet kundër Gjonajt filluan si rezultat i një hetimi të thelluar nga skuadra mobile e Milanos, lidhur me sulmin ndaj Enzo Anghinellit më 12 prill 2019 në Milano. Për këtë ngjarje janë dënuar në shkallë të parë si porositësi i dyshuar Luca Lucci dhe autori Daniele Cataldo.
I shpallur në kërkim që nga dhjetori 2024, Gjonaj u lokalizua në fillim të qershorit në Emiratet e Bashkuara Arabe, konkretisht në Dubai, pas një hetimi kompleks të kryer në bashkëpunim me forcat ndërkombëtare të rendit.
Në kuadër të të njëjtit hetim, më 17 dhjetor 2024 dhe 4 prill 2025 u arrestuan 12 persona, përfshirë edhe Luca Luccin, i cili tashmë ishte në burg.
Sipas hetimeve, Lucci dhe Gjonaj kanë qenë ortakë në menaxhimin e një trafiku të madh droge nga Spanja dhe Maroku drejt Italisë. Mbi 3.5 ton droga janë trafikuar gjatë shtatë muajve, me fitime që arrijnë deri në rreth 1000 euro për kilogram hashash, dhe edhe më shumë për marijuanë dhe kokainë. Hashashi dhe marijuanë transportoheshin me kamionë drejt një magazine në Inveruno, pranë Milanos. Më pas, shpërndarja te shpërndarësit bëhej përmes dy punonjësve të Amazon, të cilët shfrytëzonin lirinë e lëvizjes për të transportuar drogën.
