Prej pesë ditësh, fusha e mbetjeve urbane në Elbasan vazhdon të lëshojë tym dhe gazra toksike, duke mbuluar qytetin me ndotje të rrezikshme për shëndetin.
Edhe pse flakët janë shuar në sipërfaqe, mbetjet vijojnë të digjen në thellësi, duke përhapur substanca helmuese në atmosferë dhe duke ndikuar rëndë në cilësinë e ajrit.
Megjithëse landfilli është përfshirë nga flakët edhe më parë, kjo është hera e parë që zjarri zgjat për ditë të tëra pa u shuar plotësisht.
Në terren janë ende të angazhuara forcat zjarrfikëse të Elbasanit, mbështetur nga ato të bashkive fqinje, strukturat e emergjencave civile dhe ushtria me pajisjet e saj.
Situata është bërë edhe më kritike për shkak të temperaturave ekstreme, që kanë kaluar 40 gradë Celsius. Elbasani ndodhet përballë një emergjence serioze mjedisore, ku mijëra qytetarë janë të detyruar të thithin ajër të ndotur prej pesë ditësh.
Ndërkohë, edhe në bashkitë përreth gjendja është përkeqësuar, pasi mbetjet urbane nuk mund të transportohen më në landfillin e Elbasanit, duke u lënë grumbuj në rrugë e duke rritur rrezikun për përhapjen e ndotjes dhe sëmundjeve.
