Presidenti i Shteteve të Bashkuara të Amerikës, Donald Trump, dhe homologu i tij rus, Vladimir Putin, kanë zhvilluar sot një bisedë që ka zgjatur rreth një ore.
Secili prej presidentëve shprehu qëllimin për të kërkuar një zgjidhje të negociuar për Ukrainën.
Trump ngriti çështjen e ndërprerjes së shpejtë të konfliktit në Ukrainë, raporton The Guardian.
Por Putin, këmbënguli se Rusia “do ta arrijë qëllimin e saj për të hequr problemet rrënjësore që çuan në konfliktin e Ukrainës” dhe “nuk do të tërhiqet nga qëllimet e saj”.
Qëndrimi i Rusisë është se “bisedimet për paqe në Ukrainë janë midis Moskës dhe Kievit”. Ata gjithashtu patën një diskutim të detajuar mbi Iranin dhe Lindjen e Mesme.
Dy presidentët ranë dakord që do të vazhdojnë diskutimet në të ardhmen.
Diplomati Yuri Ushakov, u shpreh më herët për gazetarët se Putin e informoi Trumpin mbi zbatimin e marrëveshjeve të arritura midis Rusisë dhe Ukrainës muajin e kaluar për shkëmbimin e të burgosurve të luftës dhe ushtarëve të vdekur, e se Moska është e gatshme të vazhdojë negociatat me Kievin.
Kjo telefonatë erdhi pasi Financial Times raportoi se është parashikuar që ditën e neserme, 4 korrik, të zhvillohet një bisedë midis Trump dhe homologut të tij ukrainas, Volodymyr Zelensky.
Sakaq, Pentagoni ka pezulluar dërgimin e armëve drejt Ukrainës, duke shkaktuar një tjetër tronditje në përballjen mes Kievit dhe Moskës.
Sipas Wall Street Journal, furnizimet ushtarake amerikane, të cilat tashmë kishin mbërritur në Poloni dhe ishin në pritje për të hyrë në Ukrainë, janë bllokuar, duke ngritur shqetësime serioze për kapacitetin mbrojtës të ushtrisë ukrainase.
Gazeta amerikane citon burime nga administrata e ish-presidentit Donald Trump dhe nga Kongresi amerikan, sipas të cilave furnizimet e ndaluara përfshijnë mbi 24 raketa Patriot PAC-3, më shumë se dy duzina sistemesh mbrojtëse ajrore Stinger, raketa ajër-tokë Hellfire si dhe mbi 90 raketa ajër-ajër AIM të destinuara për avionët F-16 ukrainas.
Ky zhvillim vjen në një moment kritik, me Ukrainën nën presion të madh nga ofensiva ruse dhe mbështetja perëndimore në pikëpyetje.
