Një incident i rrezikshëm ka ndodhur para pak minutash në qendër të Shëngjinit, ku një shkëndijë elektrike e ndjekur nga një shpërthim ka shkaktuar defekt në linjën që furnizon zonën me energji elektrike.
Për pasojë, një kabull i tensionit të lartë është këputur dhe ka rënë në mes të rrugës. Për fat të mirë, në momentin e ngjarjes nuk ka pasur automjete pranë, edhe pse fluksi i makinave në atë orë ishte i lartë, dhe nuk raportohet për të lënduar.
Në vendngjarje kanë ndërhyrë menjëherë policia e rendit dhe ajo bashkiake, të cilët kanë larguar kabllin nga rruga për të shmangur rrezikun.
Për shkak të defektit, energjia elektrike është ndërprerë në zonën që nis nga shkolla deri në lagjen e Portit, dhe pritet të rikthehet pas riparimit të linjës.
