Të paktën 66 fëmijë kanë humbur jetën në Rripin e Gazës si pasojë e kequshqyerjes dhe mungesës së ushqimit, raportojnë mediat e huaja.
Sipas autoriteteve lokale, humbjet e jetës vijnë si rezultat i mbylljes së zgjatur të kalimeve kufitare nga forcat izraelite dhe pengesave për hyrjen e produkteve të domosdoshme, përfshirë qumështin për foshnje dhe suplementet ushqimore për grupet më të rrezikuara, si fëmijët dhe personat e sëmurë.
Zyra e Medias e ka cilësuar situatën si një “krim lufte dhe krim kundër njerëzimit”, duke akuzuar Izraelin për përdorimin e urisë si mjet lufte ndaj popullatës civile.
“Ky veprim përbën shkelje të rëndë të së drejtës ndërkombëtare humanitare dhe Konventave të Gjenevës”, thuhet në deklaratën zyrtare.
Organizatat ndërkombëtare për të drejtat e njeriut kanë paralajmëruar vazhdimisht për rrezikun e krizës humanitare në Gaza, si pasojë e kufizimeve të ashpra në furnizimet bazë dhe shërbimet mjekësore që kanë ardhur pas përshkallëzimit të konfliktit.
Aktualisht, komuniteti ndërkombëtar vijon të bëjë thirrje për lehtësimin e aksesit humanitar dhe ndihmës emergjente në territorin e rrethuar.
