Furtunë në qeverinë greke. Një ministër dhe tre zv/ ministra kanë dhënë dorëheqjen pas skandalit me subvencionet nga Bashkimi Europian.
Zyrtarët e lartë, ministri Makis Voridis, zëvendësministri i Jashtëm Tasos Hadjivassiliou, zëvendësministri i Zhvillimit Rural Dionysis Stamenitis dhe zëvendësministri i Qeverisjes Dixhitale Christos Boukoros nën hetim për dosjen voluminoze paraqitën dorëheqjen tek kryeministri Mitsotakis, i cili e pranoi.
Në qendër të skandalit është shpërndarja e paligjshme e subvencioneve për fermerët, gjatë një periudhe gjashtëvjeçare. Vetëm pak ditë më parë, Komisioni Europian vendosi një gjobë prej 415 milionë eurosh ndaj Greqisë – një shumë që mund të shkojë deri në 600 milionë euro – për keqmenaxhimin e fondeve dhe mungesën e kontrolleve të duhura në sektorin bujqësor.
Hetimet janë intensifikuar pas mbërritjes në parlament të një dosjeje voluminoze prej mbi 3000 faqesh nga Prokuroria Europiane. Dokumenti përfshin edhe përgjime telefonike të realizuara nga Shërbimi Kombëtar i Inteligjencës, që zbulojnë ndërhyrje politike të drejtpërdrejta, manipulim të aplikacioneve dhe favorizime sistematike në shpërndarjen e fondeve europiane.
Përgjimet kanë hedhur dritë mbi një rrjet të gjerë zyrtarësh të lartë dhe politikanësh të dyshuar për përdorim të fondeve si mjet për përfitime personale dhe elektorale, ndërsa fermerët në nevojë mbeteshin jashtë skemave të ndihmës.
Në dosje përmenden biseda të komprometuese mes zyrtarëve aktualë dhe ish-funksionarëve të qeverisë, ku evidentohet manipulimi i të dhënave, ndërhyrja në bazat e të dhënave dhe pagesa për ferma apo projekte që nuk kanë ekzistuar kurrë në realitet.
Nën presionin në rritje publik dhe politik, kryeministri Kyriakos Mitsotakis ka pranuar dorëheqjen e Makis Voridisit, i cili më parë ka shërbyer edhe si ministër i Bujqësisë dhe ka mbikëqyrur agjencinë OPEKEPE, përgjegjëse për administrimin e fondeve bujqësore.
Krahas tij, kanë dhënë dorëheqje edhe zëvendësministrat Tasos Haxhivassiliou (i Jashtëm), Dionysis Stamenitis (Zhvillimi Rural), Christos Boukoros (Qeverisja Dixhitale), si dhe Sekretari i Përgjithshëm për Zhvillimin Rural, Giorgos Stratakos.
Hetimet pritet të thellohen në ditët në vijim, me mundësinë e zgjerimit të listës së të përfshirëve dhe evidentimin e praktikave të tjera abuzive që përfshijnë pagesa fiktive për kullota apo aktivitete të pakryera në realitet.
