Monopatinat elektrike po kthehen gjithnjë e më shumë në burim kryesor për aksidente rrugore dhe rrezik për jetën.
Sipas të dhënave të siguruara nga Spitali Universitar i Traumës, gjatë vitit 2024 janë paraqitur 694 persona të lënduar si pasojë e aksidenteve me këto mjete. Ndërsa vetëm në 5 muajt e parë të vitit 2025 janë regjistruar 212 raste.
Të dhënat e siguruara nga Tv Klan tregojnë se shumica e të lënduarve janë të rinj nga mosha 15 deri në 30 vjeç, por nuk mungojnë as rastet e fëmijëve apo të të moshuarve që përfshihen në aksidente, si drejtues të këtyre mjeteve ashtu edhe kalimtarë.
Nga kartelat mjekësore të Spitalit të Traumës rezulton se lëndimet nga monopatinat janë shpesh të rënda, përfshirë fraktura në kokë apo shtyllë kurrizore, të gjymtyrëve e deri në dëmtim të organeve të brendshme.
Në Shqipëri nuk ka ende një rregullim të qartë ligjor për përdorimin e monopatinave elektrike, që të përcaktojë moshën minimale, zonat e lejuara për qarkullim apo shpejtësinë maksimale të lëvizjes.
Aktualisht zbatohen rregullat që përdoren për përdoruesit e biçikletave, ndonëse specifikat e këtyre dy mjeteve janë të ndryshme.
Në rrugët e Tiranës dhe qyteteve të tjera sheh vazhdimisht përdorues të monopatinave pa helmeta mbrojtëse apo raste të ngarjes së tyre nga dy persona, çka e shton rrezikun për aksidente.
Shpejtësia është një tjetër problematikë, pasi këto mjete jo vetëm janë vështirësisht të dallueshme, por edhe frenimi i beftë i tyre vlerësohet si tepër i rrezikshëm. Gjatë natës përdorimi i tyre e shton rrezikun, pasi kanë ndriçim të dobët ose fare.
Infrastruktura e papërshtatshme është një tjetër disavantazh për përdorimin e tyre, pasi trotuaret dhe korsitë e biçikletave janë të ngushta ose mungojnë tërësisht në disa rrugë.
Teksa numri i përdoruesve të monopatinave elektrike po shtohet e bashkë me to po rritet edhe numri i aksidenteve, Shqipëria nuk ka ende një strategji të qartë për menaxhimin e tyre.
Drejtues të Policisë Rrugore pohojnë jashtë kamerave për Tv Klan se kanë gjobitur dhe sekuestruar vazhdimisht mjete të tilla, por mungesa e një legjislacioni të qartë e vështirëson gjetjen e një zgjidhjeje për këtë fenomen që rrezikon të marrë jetë njerëzish çdo ditë./ Tv Klan
