Në muajin shtator të këtij viti pritet të nisë legjislatura e re parlamentare, e cila do të sjellë largimin nga Kuvendi të 82 deputetëve aktualë që nuk arritën të sigurojnë një mandat të ri, qoftë sepse nuk ishin përfshirë në listat zgjedhore, apo qoftë sepse nuk morën mjaftueshëm vota.
Megjithatë, edhe pse nuk do të kenë më funksione zyrtare në Kuvend, këta ish-deputetë do të vijojnë të përfitojnë nga buxheti i shtetit për disa vite. Sipas nenit 7 të ligjit për pensionet shtetërore suplementare, çdo deputet, pas përfundimit të mandatit, përfiton dy paga të plota dhe më pas gjysmën e pagës mujore bruto për një periudhë deri në tre vjet.
Duke marrë parasysh se paga bruto mujore e një deputeti është 310 mijë lekë, çdo ish-deputet do të marrë 155 mijë lekë në muaj deri në vitin 2028.
Nga 82 deputetët që nuk do të jenë më pjesë e Kuvendit, 45 vijnë nga Partia Socialiste, 34 nga Partia Demokratike dhe 3 nga Partia Socialdemokrate.
Ky trajtim financiar ka shkaktuar reagime të forta në publik, pasi shihet si një barrë e rëndë për financat publike, në një kohë kur fondet mund të ishin orientuar drejt nevojave më urgjente të qytetarëve dhe komuniteteve.
