Deputeti i Partisë Socialiste, Erion Braçe, ka reaguar ashpër përmes një postimi në rrjetet sociale lidhur me çmimet e larta të frutave dhe perimeve në tregjet shqiptare, veçanërisht në kryeqytet. Ai i cilëson këto çmime si të pajustifikueshme dhe pasojë e abuzimeve të tregtarëve dhe strukturës së çoroditur të tregtimit bujqësor.
“Të blesh të hënën është tmerr, por ndoshta edhe çdo ditë tjetër,” shprehet Braçe, duke listuar çmimet aktuale që ai i quan të frikshme për fruta dhe perime sezonale: domate 110-130 lekë/kg, kastravecë 100-110 lekë/kg, bizele 300 lekë/kg, qershi deri në 1000 lekë/kg. Ndërkohë që shalqiri, megjithëse në sezon dhe me prodhim të bollshëm, ka arritur në 60 lekë/kg, ndërkohë që në Divjakë shitet për vetëm 23 lekë/kg.
Tre arsyet kryesore për çmimet e larta sipas Braçes janë:
- Abuzimi me çmimet dhe mungesa e kontrollit
Ai kërkon shpërbërjen e “Tregut të Autostradës”, të cilin e konsideron një pikë abuzimi me tarifat dhe kostot. Braçe propozon që bujqit të kenë akses të drejtpërdrejtë në tregjet publike, pa ndërmjetës. Gjithashtu, ai kërkon barazim të TVSH-së për produktet bujqësore dhe fiskalizim nga bujku te konsumatori final. - Struktura e prodhimit bujqësor
Braçe kritikon mbështetjen gjithnjë e më të madhe ndaj serave, të cilat sipas tij nuk janë të përshtatshme për temperaturat ekstreme të verës apo dimrit. Ai bën thirrje për rikthim në prodhimin fushor, sidomos në zonat që kanë kushte më të favorshme klimatike. - Ndryshimet klimatike
Sipas tij, fenomenet ekstreme klimatike po godasin prodhimin bujqësor në mënyrë të përsëritur, duke dekurajuar bujqit dhe duke sjellë çmime të padrejta për konsumatorët. Braçe kërkon më shumë angazhim të institucioneve për t’u marrë seriozisht me mbrojtjen dhe përshtatjen ndaj ndryshimeve klimatike.
Përfundimi i tij është i ashpër: “Zgjedhjet kanë mbaruar, por kokëfortësia e politikës për të mos ndryshuar sistemin po paguhet nga qytetari me çmime të kripura në çdo pazar.”
