Presidenti turk, Recep Tayyip Erdogan, është treguar i ashpër me Netanyahun dhe qeverinë e tij, duke deklaruar se sulmet e Izraelit ndaj Iranit, pak para një raundi të ri bisedimesh bërthamore me Shtetet e Bashkuara, synojnë të “sabotojnë negociatat”.
Duke folur në një konferencë diplomatike në Stamboll, ku mori pjesë edhe ministri i jashtëm i Iranit, Erdogan denoncon “banditizmin e hapur” të Izraelit dhe e akuzon atë për përpjekje për të destabilizuar Lindjen e Mesme.
“Qeveria e Netanyahut po dëshmon se është pengesa më e rëndësishme për paqen në rajon. Qeveria e Netanyahut në fakt synonte të minonte procesin e negociatave me sulmet e saj më 13 qershor”, deklaroi presidenti turk.
Ndërkohë forcat Mbrojtëse të Izraelit (IDF) kanë dhënë detaje të mëtejshme mbi sulmet e tyre në Iranin jugperëndimor.
“Më herët sot, afërsisht 30 avionë luftarakë të Forcave Ajrore, nën drejtimin e inteligjencës nga Departamenti i Inteligjencës, sulmuan dhjetëra objektiva ushtarake në zonën Mahvaz në Iranin jugperëndimor me më shumë se 50 municione”, shkruajnë ata në X.
Një vendndodhje ushtarake ku ruheshin lëshues raketash dhe infrastrukturë tjetër ushtarake ishte në shënjestër, shtohet në deklaratë.
