Kompania amerikane Maxar Technologies publikoi sot imazhe satelitore me rezolucion të lartë, të cilat tregojnë dëme të rënda në kompleksin e reaktorit me ujë të rëndë në Arak, rreth 230 kilometra në jugperëndim të Teheranit.
Fotografitë “para dhe pas”, të marra më 18 dhe 19 qershor, zbulojnë një vrimë të madhe në kupolën kryesore të strukturës, që dëshmon për një goditje të drejtpërdrejtë dhe të fuqishme ndaj ndërtesës.
Maxar publikoi gjithashtu pamje që tregojnë dëme në disa kulla dhe struktura të tjera brenda kompleksit.
Dy kulla duken të dëmtuara pjesërisht, ndërsa dy ndërtesa pranë tyre janë gati tërësisht të shkatërruara.
Më herët gjatë ditës, si Izraeli ashtu edhe Irani konfirmuan se reaktori në Arak ishte objektivi i sulmit të fundit.
