Mediat izraelite raportojnë se disa raketa kanë rënë në zona të ndryshme të Izraelit, si pjesë e një vale të re sulmesh hakmarrëse të nisura nga Irani.
Sipas Radios së Ushtrisë Izraelite, një raketë goditi qytetin Haifa, ndërsa një tjetër ra mbi një ndërtesë në pjesën lindore të Tel Avivit. Gazeta Yedioth Ahronoth njoftoi gjithashtu për një raketë që ka rënë drejtpërdrejt mbi një ndërtesë në Izraelin verior.
Autoriteti Izraelit i Transmetimeve konfirmoi se katër persona u plagosën në zonën e Lachishit, ndërsa dy ndërtesa u dëmtuan në Haifa.
Ushtria izraelite ka zbuluar më shumë raketa të lëshuara nga Irani dhe u ka bërë thirrje qytetarëve që të kërkojnë strehim nëpër bunkerë. Sipas stafit të CNN, në Tel Aviv janë dëgjuar sirenat e alarmit dhe shpërthime të shumta.
Forcat e Mbrojtjes së Izraelit (IDF) deklaruan se sistemet mbrojtëse janë aktivizuar dhe po përpiqen të neutralizojnë kërcënimin.
Nga ana tjetër, agjencia shtetërore iraniane IRNA raportoi se “një breshëri e re raketash dhe dronësh” është lëshuar drejt Izraelit, duke publikuar pamje që sipas saj tregojnë raketat duke goditur objektivat e tyre.
Ndërkohë, bilanci i viktimave nga sulmet izraelite ndaj objektivave iraniane raportohet të ketë arritur në 128 të vrarë. Irani ka paralajmëruar për hakmarrje të mëtejshme, duke deklaruar: “As në bunkerë nuk do të gjeni shpëtim.”
