Fredi Beleri: Rama më bëri eurodeputet, unë as nuk e ëndërroja

Eurodeputeti Fredi Beleri tregoi se arriti të zgjidhet në Parlamentin Evropian për shkak të përballjes së tij me kryeministrin Edi Rama gjatë fushatës për bashkinë e Himarës.

I ftuar në emisionin “Now” në Euronews Albania, tha se gjatë kohës në burg as nuk e kishte ëndërruar se do merrte një pozicion të tillë. Sipas tij, ai bashku me disa banorë të Himarës synonin të fitonin bashkinë për të kontribuar për vendin e tyre, por përballja me kryeministrin dhe drejtësinë, e shtynë atë në këtë pozicion.

“Në burg kam qenë 16 muaj, njeriu kur kalon një problem është si të mos e ketë pasur kurrë, isha në burg, dola, tani jam eurodeputet, s’e kisha ëndërruar as e kisha qëllim. Unë me disa himarjotë të tjerë donim të fitonim bashkinë Himarën që të punonim për vendin tonë. Sulmi i paprecedentë i kryeministrit, mënyra se si drejtësia u përdor prej tij, arrita që sot të jem eurodeputet. Kanë merita jo vetëm kryeministri, por edhe gjykatësit, prokurorët të cilët nën urdhrat e tij bënë një çështje që nuk ke nga ta kapësh, që nuk ka asnjë të vërtetë brenda dhe këtë padrejtësi kryeministri dhe populli greke kuptoi që kjo përndjekje ishte e padrejtë dhe më dhanë votën për eurodeputet”, tha Beleri.