Izraeli godet objektivat bërthamore dhe komandantët ushtarakë iranianë në një sulm madhor
Pamje nga një shpërthim në kryeqytetin iranian, Teheran, pas një sulmi më 13 qershor 2025
Ushtria izraelite ka deklaruar se Irani ka lëshuar rreth 100 dronë drejt territorit të saj, si kundërpërgjigje ndaj një sulmi të madh që Izraeli kreu gjatë natës në objektiva strategjikë në Iran.
Sipas Forcave të Mbrojtjes të Izraelit (IDF), janë goditur disa objekte bërthamore në Iran dhe pretendohet se shefi i Gardës Revolucionare, Hossein Salami, së bashku me disa komandantë të tjerë të lartë, janë vrarë.
Televizioni shtetëror iranian raportoi se zona rezidenciale në Teheran janë goditur dhe se ka viktima në radhët e civilëve – përfshirë edhe fëmijë – megjithatë këto të dhëna nuk janë verifikuar në mënyrë të pavarur.
Kryeministri izraelit, Benjamin Netanyahu, e quajti këtë ofensivë “Operacioni Luani i Rilindur” dhe theksoi se Irani përbën një kërcënim për “vetë mbijetesën e Izraelit”.
Izraeli ka shpallur gjendje të jashtëzakonshme, duke paralajmëruar se priten kundërsulme “në një të ardhme të afërt”.
Ndërkohë, Irani ka akuzuar Shtetet e Bashkuara për mbështetje të drejtpërdrejtë ndaj këtij sulmi, gjë që është mohuar ashpër nga Uashingtoni. Presidenti amerikan Donald Trump deklaroi për Fox News se ishte në dijeni të sulmit përpara se të ndodhte, por këmbënguli se SHBA nuk kishte asnjë rol në të.
