Autoriteti i Mbikëqyrjes Financiare (AMF) ka përgatitur disa shtesa dhe ndryshime në ligjin “Për veprimtarinë e sigurimit dhe risigurimit”, me qëllim përputhjen me direktivën europiane “Për fillimin dhe zhvillimin e veprimtarive të sigurimit dhe të risigurimit” apo siç njihet direktiva e Solvency (Aftësisë Paguese) 2.
Ndër risitë kryesore që pritet të sjellë ligji i ri është aplikimi i parimeve të reja në kërkesat për kapital ndaj shoqërive të sigurimit. Kërkesat për kapital nuk do të jenë më fikse, por të ndryshueshme, duke u rritur në përpjestim me rrezikun që çdo kompani sigurimi merr përsipër.
Sipas draftit të hedhur për konsultim publik, shoqëritë e sigurimit duhet të kryejnë vetëvlerësimin e rrezikut dhe aftësisë paguese si pjesë e sistemit të administrimit të rrezikut.
Ky vlerësim duhet të përfshijë të paktën nivelin e kapitalit të kërkuar në raport me profilin e rrezikut, kufijtë e miratuar të tolerancës ndaj rrezikut, si dhe strategjinë e biznesit dhe pajtueshmërinë në vijimësi me kërkesat për kapital dhe kërkesat për mjaftueshmërinë e provigjoneve teknike.
Vetëvlerësimi i rrezikut dhe aftësisë paguese duhet të jetë pjesë integrale e strategjisë së biznesit dhe duhet të merret në konsideratë, në mënyrë të vazhdueshme, në vendimet strategjike që merr shoqëria.
Shoqëritë e sigurimit duhet të kryejnë rregullisht dhe menjëherë pas çdo ndryshimi të konsiderueshëm të profilit të rrezikut, vlerësimin e profilit tërësor të rrezikut dhe aftësisë paguese, në nivel individual ose në nivel të grupit të sigurimeve.
Ato duhet të dokumentojnë në çdo fazë dhe veprim të procesit të vlerësimit të rrezikut dhe të kryerjes së provave të rezistencës, si dhe informojnë Autoritetin, brenda datës 31 maj të çdo viti, për rezultatet e çdo vetëvlerësimi të rrezikut dhe aftësisë paguese.
Të gjitha politikat dhe procedurat e ndërmarra nga shoqëria, në kuadër të administrimit të rrezikut, duhet të jenë të dokumentuara dhe të përditësuara në çdo kohë.
AMF-ja do të miratojë një rregullore të posaçme për përcaktimin e afateve dhe përmbajtjes së raportit vjetor të vetëvlerësimit të rrezikut të shoqërisë së sigurimit.
Raporti i vetëvlerësimit të rrezikut dhe aftësisë paguese duhet të përfshijë të paktën rezultatet cilësore dhe sasiore të vetëvlerësimit të rrezikut dhe aftësisë paguese dhe konkluzionet e nxjerra prej tyre nga shoqëria e sigurimit; metodat dhe supozimet kryesore të përdorura në vetëvlerësimin e rrezikut dhe aftësisë paguese; informacion mbi nevojat e përgjithshme të shoqërisë për aftësi paguese dhe krahasimin midis këtyre nevojave me kërkesat rregullatore për kufirin minimal të aftësisë paguese; informacion mbi devijime të rëndësishme të rreziqeve që nuk pasqyrohen në llogaritjen e kërkesës për kapital të aftësisë paguese./monitor
