Vijon të zhvillohet në Gjykatën e Posaçme Kundër Korrupsionit dhe Krimit të Organizuar (GJKKO), seanca e radhës për rrëmbimin, vrasjen dhe zhdukjen misterioze të Jan Prengës. Në këtë çështje hetimore të pandehur janë Dritan Rexhepi, Aldo Manjishta, Gentian Funiqi, Korado Gështenja, Martin Bleta, Artan Doçaj, Geraldo Martini.
Në seancë gjykata ka bërë me dije se nga Britania e Madhe ka mbërritur një letërporosi ku jepet përgjigja për kërkesën e autoriteteve shqiptare me qëllim marrjen në pyetje të vëllait të viktimës, Astrit Prenga dhe Gëzim Shullani.
Në letërporosi autoritetet britanike kërkojnë më shumë invormacion mbi statusin penal të dy shtetasve përpara se të procedojnë me marrjen e tyre në pyetje. Gjithashtu në letërporosi sqarohet me marrjen në pyetje të dy shtetasve do të ngarkohen autoritetet britanike në bazë të pyetjeve që do tu dërgohen nga autoritetet shqiptare.
“Para se të rishqyrtojmë kërkesën tuaj, duam të dimë statusin penal të personave që do të dëshmojnë, detaje mbi pyetjet që do t’u bëhen, akuzat për të cilat kërkohen dëshmitë, si dhe sesi dëshmia e tyre mund të shërbejë në hetimin e SPAK”, thuhet në letërporosi.
Rrëmbimi dhe vrasja e Jan Prengës:
Kujtojmë që Jan Prenga u rrëmbye më 17 janar të 2020 pranë banesës së tij në rrugën “London” në Kamëz. Jan Prenga u rrëmbye pas një konflikti që vëllai i tij kishte me trafikantët shqiptarë të kokainës, pasi u akuzua se kishte përvetësuar një ngarkesë prej 260 kilogram kokainë në Britaninë e Madhe.
Ai dyshohet se është vrarë në kompleksin luksoz “Golden” i cili është në pronësi të dy vëllezërve Altin dhe Emiliano Hajri. Trupi i Prengës ende nuk është gjetur po ka dyshime të forta se ai u rrëmbye edhe u vra për shkak të dhunës barbare të ushtruar ndaj tij, duke i “mbetur” në dorë rrëmbyesve që u porositën nga Altin Hajri.
Motiv i krimit dyshohet të jetë një ngarkesë kokaine prej 260 kg, ku ishte i përfshirë vëllai i të ndjerit. Sakaq, “Golden” është një ndër komplekset më të njohura në vend, për shkak të madhështisë dhe luksit, duke u kthyer në zgjedhjen e shumë çifteve të reja për të kurorëzuar martesën e tyre. Mirëpo, prapaskenat e errëta të krimit nuk i zbeh dot as bardhësia e kompleksit të vëllëzërve Hajri, të cilit i fshihen drejtësisë prej më shumë se 4 vite.
