Partia e Lirisë përmes Sekretarit të Përgjithshëm, Tedi Blushi ka depozituar një kërkesë në KQZ dhe kërkon hapjen e të gjitha kutive të votimit për Kavajën. Ankesa vjen tre javë pas zgjedhjeve të 11 Majit dhe qëllimi mbetet i paqartë, pavarësisht deklarimeve.
Numri dy i Partisë së Lirisë kërkon nga Komisioni Qendror i Zgjedhjeve që të hapen të gjitha kutitë e njësive administrative që përbëjnë zonën zgjedhore Kavajë dhe të rinumërohen të gjitha fletët e votimit.
“Të rinumërohen të gjithë fletët e votimit në Bashkinë Kavajë. Dyshime të arsyeshme për parregullsi gjatë procesit të numërimit të votave Kërkesa jonë në funksion të transparencës dhe legjitimitetit të rezultatit përfundimtar”, thuhet në kërkesën e PL drejtuar KQZ-së.
Kavaja është e vetmja bashki e qarkut të Tiranës e cila u fitua nga Partia Demokratike, duke mbetur një bastion i së djathtës, ndërkohë që katër bashkitë e tjera i mori Partia Socialiste.
Është e paqartë se përse Partia e Lirisë kërkon rinumërim të të gjitha kutive, në një kohë që këtë nuk po e bën partia humbëse, ajo socialiste, si dhe kur vetë është në koalicion me partinë që ei ka fituar zgjedhjet e 11 Majit në bashkinë qendër të së djathtës.
