Ukraina i dha një goditje të rëndësishme forcës ajrore ruse, duke nisur një sulm masiv me dronë të dielën, duke shkatërruar mbi 40 avionë rusë, sipas palës ukrainase.
Sulmi ndodhi në prag të bisedimeve të planifikuara Kiev-Moskë në Stamboll.
Të dy delegacionet do të udhëtojnë për në Turqi.
Kjo nuk është hera e parë që Ukraina ka goditur aeroportet ruse, disa prej të cilave madje strehojnë avionë strategjikë kritikë.
Sulmi, me emrin e koduar “Pavutyna” (“rrjeta e merimangës”), kishte në shënjestër të paktën katër baza ajrore ruse, përkatësisht Belaya, Diaghilev, Oleny dhe Ivanovo.
Midis avionëve të shkatërruar janë bombarduesit Tu-95 dhe Tu-22M3, si dhe avionë A-50.
Imazhe të pakonfirmuara të publikuara tregojnë disa bombardues strategjikë rusë Tu-95MS në flakë. Deri më tani, Rusia nuk ka bërë asnjë njoftim.
Sipas Sky News, sulmi u krye nga shërbimi i inteligjencës ukrainase SBU.
Një burim në shërbim i tha rrjetit se dronët kishin në shënjestër avionë që bombardojnë qytetet ukrainase çdo natë.
Informacioni i publikuar në internet tregon se dronët ishin të fshehur në kamionë dhe u lëshuan në një distancë të shkurtër nga bazat.
