Festime, kaos, të plagosur, viktima dhe shumë trazira, kështu mund të përshkruhet situata në Paris pas fitores së shënuar një ditë më parë nga djemtë parizienë.
Burime për mediat bëjnë me dije se qindra persona kanë rënë në prangat e policisë, ndërkohë që dy persona kanë humbur jetën. Flakët dhe fishekzjarret ndriçuan qytetin, boritë e makinave dëgjoheshin në qytet, kulla “Eiffel”, u ndriçua me ngjyrat blu dhe të kuqe, ndërkohë që më pas gjaku “lahu” rrugët e Francës.
Finalja në Mynih u ndoq gjerësisht në të gjithë Parisin, përfshirë edhe brenda stadiumit Parc des Princes të PSG-së , ku ndeshja u transmetua në një ekran gjigant.
Megjithatë, fitorja 5-0 ndaj Interit çoi gjithashtu në disa trazira. Mësohet se dy persona, një i mitur në Dac dhe një grua në Paris, humbën jetën pas mesnatës, ndërkohë që 558 persona u arrestuan gjatë festimeve për triumfin e PSG ndaj Interit.
I mituri që humbi jetën, thuhet se i përket moshës 17-vjeçare dhe u godit për vdekje me thikë gjatë një tubimi për të festuar fitoren e klubit parizien, ndërsa në lagjen 15-të të kryeqytetit, një grua me një skuter, u godit nga një makinë. Fatkeqësisht si pasojë e plagëve të marra ajo humbi jetën në vendin e ngjarjes.
Festa përfundoi në një kaos të vërtetë edhe në Grenoble, ku katër persona nga e njëjta familje u përplasën nga një automjet i cili ishte duke qarkulluar me shpejtësi. Si pasojë të katër anëtarët e kësaj familje mbetën të plagosur, ku dy prej tyre ndodhen në gjendje të rëndë për jetën.
“Një automjet thuhet se humbi kontrollin, duke goditur katër persona, dy prej të cilëve u plagosën rëndë”, tha prefektura, duke shtuar se shoferi u dorëzua vetë në polici dhe ndodhet në ambientet e paraburgimit.
Sipas burimeve mësohet se shoferi ishte duke i dhënë mjetit të tij me një shpejtësi të lartë, kur papritur humbi kontrollin dhe mori para turmën e njerëzve të cilët ishin mbledhur për të festuar fitoren e PSG-së.
Si pasojë të plagosur mbetën dy të rinj 17-vjeçarë dhe dy gra të moshës 23 dhe 46 vjeç, anëtarë të së njëjtës familje.
