Një shpatë e rrallë që dikur i përkiste Napoleon Bonapartit u shit në ankand për 4.7 milionë euro në Paris, një shumë pothuajse shtatë herë më e lartë se çmimi fillestar i caktuar nga shtëpia franceze e ankandeve “Giquello”.
Kjo armë elegante, e punuar me mjeshtëri dhe hollësi nga një prej armëpunuesve më të shquar të epokës, Nicolas-Noël Boutet, është mbajtur nga Napoleoni gjatë kohës kur ai ishte Konsulli i Parë i Francës, në periudhën e Republikës së Parë.
Ai e zotëroi shpatën deri në fund të sundimit të tij në vitin 1814, për ta dhuruar më pas tek një nga komandantët e tij më besnikë, Emmanuel de Grouchy. Familja e Grouchy-t e ruajti shpatën për shumë breza.
Me këtë çmim, shpata u rendit si arma e dytë më e shtrenjtë e Napoleonit e shitur ndonjëherë, pas një tjetër shpate të ngjashme që arriti vlerën 4.8 milionë euro në vitin 2007.
Ndërkohë, më 25 qershor, në një ankand tjetër që zhvillohet online në Paris, do të hidhen në shitje 150 objekte të tjera personale të Napoleonit, mes të cilave përfshihen mëngë nga veshjet e tij, një fron, gota, pirunj, thika e të tjera sende që janë ekspozuar më parë në Hong Kong.
