Policia greke ka arrestuar 20 anëtarë të dyshuar të një bande trafikantësh të qenieve njerëzore, të lidhur me më shumë se 500 raste të hyrjes së paligjshme, raportoi transmetuesi ERTNews duke cituar policinë e Athinës.
Raportohet se emigrantët janë pajisur me dokumente udhëtimi të falsifikuara që u kanë lejuar atyre të vazhdojnë udhëtimin drejt vendeve të tjera të Bashkimit Evropian.
Banda thuhet se ka fituar rreth 4,0 milionë euro (4,5 milionë dollarë) nga aktivitetet e saj. Sipas raportimeve, drejtuesi i bandës, anëtarët e së cilës besohet se janë nga Siria dhe Egjipti, është midis të arrestuarve.
Forcat speciale të policisë kontrolluan disa ambiente në zonën metropolitane të Athinës, të cilat funksiononin edhe si laboratorë për falsifikimin e dokumenteve të udhëtimit.
U sekuestruan gjithashtu disa pasaporta të falsifikuara, së bashku me vulat e tyre. Gjithashtu u sekuestruan shuma të mëdha parash dhe pajisje teknike.
Hetuesit grekë thanë se pasaportat e falsifikuara po shiteshin për çmime prej më shumë se 4,000 eurosh, varësisht nga cilësia.
Emigrantët nga Lindja e Mesme dhe Afrika mbërrijnë në Greqi pothuajse çdo ditë. Shumica e tyre synojnë të vazhdojnë udhëtimin e tyre drejt vendeve të tjera të Unionit.
