Kryetari i Partisë së Lirisë, Ilir Meta ka reaguar nga qelia pas nisjes së procesit të numërimit të votave.
Meta, ka akuzuar qeverinë dhe strukturat shtetërore për përpjekje të qëllimshme për manipulim dhe kriminalizim të procesit zgjedhor.
Kreu i PL, i referohet ngjarjeve të ndodhura në Vorë dhe në Tiranë, ku sipas tij është evidentuar një “banditizëm elektoral” i mbështetur nga pushteti, ndërsa thekson se asgjë nuk do të ndalë fitoren e opozitës dhe ndëshkimin e ashpër të atyre që po shkelin demokracinë.
Ai ka bërë thirrje për qetësi dhe vigjilencë në numërimin e votave, duke i falënderuar qytetarët që votuan për “Ndryshimin” pavarësisht presioneve.
Meta: Edhe në oret e fundit që Narkoshteti po jep shpirt, po bën gjithçka për të prishur standartin e zgjedhjeve.
Banditizmi elektoral i qëllimshëm dhe për orë të tëra në Vorë dhe kriminaliteti elektoral te zyra ilegale e “Rilindjes” në Tiranë, ku horrat që blinin vota ja mbathën vrapit dhe që u zbulua falë “Task Force” të Syri TV, si dhe mosreagimi i SPAK dhe gjithë insitucioneve që bënin paradë përbetimi për të parandaluar krimet zgjedhore, janë pasqyra e fytyrës së vërtetë kriminale të Edi Ramës.
Por asgjë nuk e ndal dot fitoren dhe verdiktin e popullit dhe një ndëshkim shumë i rëndë i pret banditët “rilindas”, shkatërrues të demokracisë.
Dua të falenderoj me mirënjohje të gjithë qytetarët, në veçanti ata që votuan Ndryshimin pavarësisht nga presioni dhe përpjekjet për frikësim sistematik.
Në këtë fazë të procesit zgjedhor, i ftoj të gjithë numëruesit për të ruajtur qetësinë, vendosmërinë dhe për të mbrojtur çdo votë për të garantuar FITOREN e pastër të koalicionit “PD-ASHM”.
