“Giro d’Italia” ka humbur një nga emrat më të rëndësishëm që në etapën hapëse, e cila u zhvillua në Shqipëri. Mikel Landa, çiklisti spanjoll 35-vjeçar dhe një nga pretendentët kryesorë për fitoren finale, u rrëzua pas një përplasjeje me një shtyllë në një kthesë të shpejtë pranë zonës së Freskut, vetëm pak kilometra larg finishit.
Për shkak të lëndimit të rëndë që pësoi, ai nuk ishte në gjendje të lëvizte dhe u transportua menjëherë me barrelë drejt ambulancës, pasi u kuptua që situata ishte serioze. Në mbrëmje, skuadra e tij “Soudal-Quick Step” konfirmoi se Landa kishte pësuar një frakturë në vertebrën e toraksit T11.
Dëmtimi kërkon që ai të qëndrojë për një periudhë të gjatë në pozicion të shtrirë, përpara se të nisë procesin e riaftësimit. Për momentin, është vendosur që ai të kalojë natën në spitalin e Tiranës, ndërsa të shtunën do të shqyrtohen mundësitë për kthimin e tij në shtëpi, në përputhje me udhëzimet e mjekëve specialistë.
