Shiko videon KËTU!
Shoqata për Ruajtjen dhe Mbrojtjen e Mjedisit Natyror në Shqipëri (PPNEA) ka shpërndarë disa pamje tronditëse nga laguna e Nartës në Vlorë, ku një koloni e madhe flamingosh largohet menjëherë pas dëgjimit të zhurmës së dy avionëve testues për Aeroportin e Vlorës.
Videot, të cilat janë regjistruar dje, tregojnë qartë se flamingot reagojnë ndaj zhurmës përpara se avionët të bëhen të dukshëm në horizont. Sipas PPNEA-s, qindra flamingo kishin filluar të grumbulloheshin dhe po shfaqnin sjellje që tregonin përpjekje për folezim, njësoj si disa vite më parë në këtë zonë. Megjithatë, ato u detyruan të braktisin vendin potencial të folezimit për shkak të shqetësimit të shkaktuar nga avionët.
“Nëse aeroporti fillon të funksionojë pas një viti apo më shumë, dhe në të realizohen dhjetëra fluturime çdo ditë, do të përballemi me zhdukjen e popullatave të shpendëve dhe degradimin e njërit prej habitateve më të rëndësishme për jetën e egër në vend”, thuhet në reagimin e PPNEA.
Kujtojmë se dje, më 8 maj, u zhvilluan dy fluturime testuese në Aeroportin e Vlorës. Në pistën e re u ulën një avion italian i tipit Piaggio P.180 Avanti me regjistër I-ENAV, që i përket Autoritetit të Aviacionit Civil Italian, dhe një avion çarter luksoz i kompanisë zvicerane Travelcoup, tipi Embraer ERJ-145 me regjistër D-AMME.
