Kryeministri Edi Rama mbylli fushatën në qarkun e Fierit, duke e cilësuar këtë të fundit si “kryeqyteti i socialistëve”.
Sipas Ramës, detyra e Partisë Socialiste është anëtarësimi i Shqipërisë në Bashkimin Evropian, që e cilësoi si një amanet i të parëve tanë, duke u kthyer pas në kohë deri tek Skënderbeu. Po kështu, kryesocialisti tha se duke qenë një ndër popujt më të vjetër të këtij kontinenti, ne kemi zakone evropiane, por nuk kemi statusin si qytetarë të barabartë, njësoj si shtetet anëtare në BE.
“Shumë faleminderit. Është pamje fantastike këtu dhe do ishte bukur shumë sikur të ishin këtu e të shihnit atë që shoh unë sepse është vërtetë det siç tha Zegjineja, det kuqezi e s’ka si të jetë ndryshe sepse Tirana është kryeqyteti i Shqipërisë, Fieri është kryeqyteti i socialistëve.
Kur ne kemi nisur këtë rrugë së bashku, ky shesh nuk ekzistonte. Përkundrazi ekzistonte problemi i kthyer në plagë e pandashme e jetës së fierit e qytetarëve të fierit. Ashtu sikundër ne e kthyem Gjanicën nga një plagë në një vlerë dhe në një kartolinë krenarie për këtë qytet, ashtu ne e kthyem të gjithë organizmin e Shqipërisë nga një plagë e hapur, në një emer që na bën krenarë kudo ku shkojmë nëpër botë nuk e ulim më kokën, nuk kemi më zor të themi jam shqiptar kur na pyesin nga je. Nuk kemi më asnjë vështirësi përkundrazi, jemi të kënaqur të tregojmë për vendin tonë, sepse gjithmonë e më shumë nga Evropa e gjithë bota vijnë në vendin tonë, duan të dinë për vendin tonë. Në këto vite ne kemi bërë shumë gjëra. Por gjëja e gjërave ka qenë dinjiteti që i kemi dhënë flamurit kuqezi, që deri dje e valëvisnim me krenari vetëm në stadiume, por nuk e shihnim gjëkundi mes flamujve të tjerë të barabartë. Ne e morëm këtë flamur dhe e ngjitëm në ato maja ku mblidhën Evropa, ata që marrin vendime. Jo 1 herë po disa herë ky flamur ishte flamuri që udhëhoqi tryeza të mëdha ndërkombëtare.
Ne jemi këtu në mes të Evropës që në fillim. Jemi ndër popujt më të vjetër të këtij kontineti. Na e ka shkruar Zoti, fati ynë të jemi këtu, e me zakon jemi evropianë. Nga ana tjetër ne kemi qenë dhe ende jemi të huaj për Evropën. Kjo është arsyeja pse ne, unë, ju, të gjithë së bashku jemi të vendosur të vazhdojmë përpjekjen tonë, sepse duam t;i japim fund statusit e të huajt mes Evropës, e ti japim statusin e qytetarisë së barabartë evropiane”, tha Rama.
