Kryetari i Partisë Demokratike, Sali Berisha pasditen e kësaj të diele është ndalur në qytetin e Mirditës për të përmbyllur në këtë zonë fushatën elektorale për zgjedhjet e 11 majit.
Ndryshe nga herët e tjera, ku mbi kokë mban kapele me numrin “1”, kësaj here demokratët kanë vendosur ta suprizojnë duke i dhuruar një plis, karakteristik i veshjeve tradicionale shqiptare.
Gjatë fjalës së tij, Berisha u shpreh optimist për rezultatin e zgjedhjeve duke thënë me bindje të plotë se java që vjen, e cila përkon dhe me zgjedhjet do të jetë java e Partisë Demokratike, java “e njishave”, duke iu referuar kështu numrit që forca politike që ai drejton mban në fletën e votimit më 11 Maj.
“Të dashur miq, kjo ishte dhe është java e Njishave. Me numrin e Zotit, Njishat kanë marrë në dorë sot, fatin e Shqipërisë. Kanë marrë në dorë fitoren e shumë pritur të datës 11 maj.Kudo që shkoj, dritën, shkëlqimin e saj, që buron nga zemra, shpirti, sytë e qytetarëve të ringritur me shpresë dhe besim për tu ndarë nga një e keqe, që ata kurrë nuk e meritonin. Për tu ndarë nga një e keqe e madhe, që po shkreton Mirditën Madhështore dhe Shqipërinë Madhështore”, tha Berisha ndër të tjera.
