Policia e Lezhës ka arrestuar tre persona të dyshuar si autorë të një vjedhjeje të ndodhur tre ditë më parë në banesën e një 66-vjeçari në fshatin Gajush, ku u morën shuma parash dhe një armë gjahu.
Në kuadër të operacionit të koduar “Telefonata”, u ndaluan shtetasit Keviliano Ndoi, 22 vjeç, banues në Mirditë dhe me precedent penal, Andi Sanço, 21 vjeç, nga Korça, si dhe Lorenc Lleshi, 22 vjeç, banues në Tirana. Ky i fundit u kap në pikën kufitare të Muriqanit, ndërsa tentonte të largohej jashtë vendit.
Gjatë operacionit, policia sekuestroi 5 celularë dhe dy automjete të përdorura gjatë kryerjes së vjedhjes. Po ashtu, është proceduar në gjendje të lirë edhe babai i Keviliano Ndoit, shtetasi Gj. N, 50 vjeç, i dyshuar për veprën penale “Përkrahja e autorit të krimit”.
Njoftimi i policisë:
Si rezultat i hetimeve të thelluara të kryera menjëherë pas telefonatës për vjedhje me dhunë, në banesën e një 66-vjeçari, në fshatin Gajush, shërbimet e Komisariatit të Policisë Lezhë dhe ato të Drejtorisë Vendore të Policisë Lezhë, në bashkëpunim me Prokurorinë e Lezhës, zbardhën dinamikën e rastit dhe arrestuan autorët e dyshuar.
Konkretisht, në kuadër të operacionit “Telefonata”, u identifikuan, u kapën dhe u vunë në pranga shtetasit K. N., 22 vjeç, banues në Mirditë (me precedent penal), A. S., 21 vjeç, banues në Korçë dhe L. Ll., 22 vjeç, banues në Tiranë (u kap nga shërbimet e PKK Muriqan, në dalje).
Nga hetimet dyshohet se 3 shtetasit janë implikuar në vjedhjen me dhunë të 1500 dollarëve, 880 eurove, 50 000 lekëve dhe 1 arme gjahu, në banesën e një 66-vjeçari, në fshatin Gajush, kryer në orët e para të mëngjesit të datës 28.04.2025.
Në vijim të operacionit, nisi procedimi në gjendje të lirë, për babanë e shtetasit K. N., shtetasin Gj. N., 50 vjeç, për veprën penale “Përkrahja e autorit të krimit”.
Materialet procedurale iu referuan Prokurorisë së Lezhës, për veprime të mëtejshme.
