Kryetari i Partisë Demokratike, Sali Berisha, pritet të udhëtojë së shpejti drejt Shteteve të Bashkuara të Amerikës.
Lajmin e bëri të ditur kandidati për deputet i PD-së, Aluon Kalaja, gjatë një interviste në emisionin “Off the Record” me Andrea Danglli në A2 CNN, ku u diskutua mbi kontratën e lobimit për heqjen e statusit “non-grata” ndaj Berishës, për të cilën janë paguar 6 milionë dollarë.
“Unë mendoj që ky Chris LaCivita që është vetë mesazhi, i ka shqetësuar shumë këta këtu. Unë jam habitur me thënë të drejtën kur ka ardhur në Shqipëri. Nuk e kam mëndu se vjen në Shqipëri. Këtyre bravo u qoftë që e sollën. Është mesazh shumë i rëndësishëm. Kini parasysh që këtu paska zbarkuar krejt Amerika. Se po flasim për avokatin e Trumpit. Avokati i Trumpit po, ai që i bëri fushatën po, se na thanë Shqipëria është një pikë ujë në oqean, nuk vijnë amerikanët. Këtu po përgatitet me ju heq dhe non-grata mesa duket Berishës, me gjithë këtë furi gjërash. Ose përgatitet vizita e tij në Amerikë, qe e kam si informacion domethënë”, deklaroi Kalaja.
I pyetur nëse kjo vizitë e Berishës në SHBA do të ndodhë përpara zgjedhjeve, Kalaja u përgjigj: “Nuk e di, nuk jam fallxhor”.
Ai shtoi më tej edhe një mundësi tjetër për realizimin e këtij udhëtimi, duke përmendur një precedent të ngjashëm me kreun e BDI-së, Ali Ahmeti.
“Po të them ça di unë. Unë di që këta po punojnë që ta çojnë në Amerikë, Berishën. Ta çojnë në një lloj forme siç shkoi për shembull Ali Ahmeti njëherë e një kohë, që ishte non-grata por shkoi në aeroport, e ndaluan dhe pastaj erdhi një senator amerikan, e mori dhe e futi brenda në Amerikë. Mund të jetë një precedent i tillë. Këtë që thash tani, e them me përgjegjësi”, u shpreh kandidati i PD.
