Pas takimit në Selanik dhe më pas në qytetin e Bilishtit, ish-kryeministri dhe kryetari i Partisë Demokratike, Sali Berisha, pasditen e kësaj të diele u ndal në Kuçovë.
Gjatë një takimi me demokratët, Berisha i bëri sërish thirrje kryeministrit dhe rivalit të tij politik, Edi Ramës për një përballje dhe debat televiziv. Gjithashtu, ish-kryeministri u ndal dhe te epitetet që kreu i socialistëve ka përdorur gjatë gjithë kësaj fushate.
Berisha e quajti Ramën “burrec 2 metra”, duke thënë se fjalori i përdorur nga kryesocialisti nuk do të pranohej as në reality show-n Big Brother.
“Burrecit dy metra, i them burrec se e meriton. E kam ftuar dhe po e ftoj para jush, hajde të ulemi në Kuçovë, të ulemi të japim llogari të dy. Ti ke qeverisur 12 vite. Unë kam 12 vite që s’kam qenë në pushtet. Nuk del dot, vetëm flet me vete çdo mëngjes ‘Sy m’sy’ sapo zgjohet po flas këtë po flas atë.
Ju e konstatoni, kalon nga një shesh në tjetrin me një tufë fjalësh bajate dhe banale të turpshme. Sikur jo kryeministër, por mund t’i vesh çdo epitet. Flet këneta zhapik, çyryk, autik, budalla. Këto janë fjalori i tij, por dhe pastaj përpiqet në një mënyrë të krijojë çarje në familje. Gjëra aq bajate, edhe në Big Brother nuk do ia pranonin, jo”, u shpreh Berisha.
