Në një kohë kur inteligjenca artificiale po shndërrohet në një mjet të domosdoshëm për zhvillimin ekonomik dhe transformimin e tregut të punës, në Shqipëri u organizua një samit ku fokusi e kishte pikërisht në këtë fushë – “AI Business Summit 2025”.
Eventi kishte fokus transformimin ekonomik përmes inteligjencës artificiale dhe u organizua nga Shoqata e Biznesit Grek në Shqipëri (HBAA) në bashkëpunim me kompaninë ndërkombëtare të konsulencës Accenture.
Në mjediset e Innovation Hub Piramida, samiti mblodhi së bashku përfaqësues të biznesit, institucioneve publike dhe komunitetit akademik, për të adresuar sfidat dhe mundësitë që sjell AI në ekonominë shqiptare.
Denald George Tafani, kryetar i HBAA, theksoi rolin që ka inteligjenca artificiale në rikonceptimin e modeleve tradicionale të zhvillimit: “Ky samit është një platformë që lidh AI me të ardhmen e biznesit shqiptar dhe në rajon. Po vendosim në qendër një nga temat më strategjike të kohës – ndikimin transformues të AI në shoqëri dhe ekonomi. AI nuk është më teknologjia e së ardhmes, por realiteti i sotëm i suksesit të biznesit.”
Ai shtoi se: “Nuk është më një çështje nëse do e zbatojmë AI në biznes, por si, ku dhe për çfarë. Për bizneset e vogla dhe të mesme, integrimi i AI paraqet sfida për shkak të kufizimeve financiare, mungesës së infrastrukturës dhe njohurive. Përmes këtij samiti, synojmë t’u ofrojmë qasje në njohuri, eksperienca dhe modele praktike për ta kthyer AI-në në një mjet për rritje dhe konkurrueshmëri.”
Samiti solli perspektiva nga figura kyçe si Dr. Kyriacos Sabatakakis, drejtor menaxhues i Accenture në Greqi, i cili prezantoi një analizë të bazuar në të dhëna për impaktin e AI në rezultatet financiare të kompanive.
“Në një studim të fundit, vetëm 13% e kompanive që kishin investuar në AI po shihnin realisht vlerë të shtuar. Kjo tregon një hendek mes perceptimit dhe rezultateve konkrete, që kërkon strategji më të qarta implementimi.
Rruga drejt suksesit kalon përmes riformatimit të organizatës, forcimit të bazës digjitale dhe zhvillimit të aftësive të reja.”
Një ndër momentet më të rëndësishme të samitit ishte theksi i vendosur mbi rëndësinë e bashkëpunimit ndërkufitar. Athanasios Astrakas, zv.kreu i Ambasadës së Greqisë në Tiranë, tha:
“Organizimi i një samiti për inteligjencën artificiale nuk është vetëm i përshtatshëm, është i domosdoshëm. AI nuk është një tendencë, por një ndryshim i domosdoshëm. Ai po riformëson mënyrën si mendojmë, punojmë dhe bashkëpunojmë. Sot, Shqipëria dhe
Greqia nuk janë vetëm fqinj, por partnerë në një ekosistem të përbashkët ekonomik që synon inovacionin dhe drejtim.”
Në diskutimet e organizuara përgjatë ditës, u trajtuan temat kyçe si bashkëpunimi njeri-makinë, infrastruktura digjitale për zbatimin e Generative AI, roli i të dhënave dhe partneriteteve teknologjike, si dhe nevoja për të ndërtuar një fuqi punëtore të gatshme për epokën e inteligjencës artificiale.
Shqipëria – një potencial për t’u kthyer në një qendër rajonale të teknologjisë
Duke reflektuar mbi hapat e para të ndërmarra nga Shqipëria për integrimin e AI në administratë dhe prokurime publike, Tafani theksoi potencialin e vendit për të ndjekur modelin grek:
“Shqipëria mund të bëhet një qendër dinamike teknologjie në Ballkan, duke ndjekur shembullin e Greqisë që është një nga shtatë vendet e BE-së me potencial për t’u kthyer në një AI HUB për Unionin. Me bashkëpunimin e aktorëve nga biznesi, qeveria dhe akademia, mund të ndërtojmë një ekosistem të fortë dhe konkurrues.”
AI Business Summit 2025 po konfirmohet si një pikë takimi strategjike për të kuptuar më mirë sesi inteligjenca artificiale po ndikon në modelet e biznesit dhe ekonomisë në tërësi.
Evente synojnë ta pozicionojnë Shqipërinë si pjesë aktive të transformimit teknologjik në biznes. Debatet, analizat dhe përvojat që ndahen në këtë platformë pritet të japin impulse konkrete për politikat publike dhe vendimmarrjen private në vitet që vijnë.
