Aktori i mirënjohur dhe i dashur për publikun shqiptar, Agron Llakaj, feston sot 65-vjetorin e lindjes. Kjo ditë, ndryshe nga vitet e tjera, ishte e mbushur me një emocion të veçantë dhe një dhimbje të thellë për artistin, pasi ai ia ka kushtuar këtë përvjetor kujtimit të bashkëshortes së tij të ndjerë, Kostandina, e cila u nda nga jeta rreth një vit më parë.
Në një mesazh prekës të publikuar në rrjetet sociale, Llakaj rrëfen boshllëkun që ndjen në këtë ditë të rëndësishme, duke e përshkruar për herë të parë ditëlindjen si një “numër i zbrazët”, për shkak të mungesës së njeriut më të shtrenjtë në jetën e tij, bashkëshortes që i jepte dritë dhe kuptim çdo feste.
“E dashur dhe e shtrenjtë Kostandina,
Unë sot mbush 65 vjeç… por për herë të parë kjo ditëlindje më duket si një numër bosh. Sepse ti nuk je më këtu, nuk je të ndriçosh me buzëqeshjen tënde si çdo vit, kur atmosfera mbushej me të qeshura…”
Duke ndarë ndjenjat me ndjekësit e tij, Llakaj shpreh falënderim për dashurinë, kujtimet dhe jetën që kanë ndërtuar bashkë. Për të, kjo ditë është më shumë një moment reflektimi dhe mirënjohjeje për gjithçka që ajo ka përfaqësuar në jetën e tij.
“…dhe unë ende jam këtu, duke ecur ngadalë drejt perëndimit të jetës, me emrin tënd në çdo hap, me praninë tënde në çdo frymëmarrje. Përgjithmonë i yti, Agroni.”
