Presidenti amerikan, Donald Trump, ka deklaruar se arritja e një marrëveshjeje me presidentin ukrainas Volodymyr Zelensky është më e vështirë sesa me Moskën, për zgjidhjen e konfliktit në Ukrainë.
Gjatë një deklarate për mediat, Trump u shpreh se beson që Rusia është e gatshme për një marrëveshje dhe se një kompromis me Kremlinin do të ishte më i lehtë. Nga ana tjetër, ai theksoi se negociatat me Zelenskyn kanë rezultuar më të ndërlikuara.
“Unë mendoj se Rusia është gati. Mendoj se mund të arrijmë një marrëveshje me të. Por duhet të kemi një marrëveshje edhe me Zelenskyn. Mendova se do të ishte më e lehtë të negociohej me të, por deri tani ka rezultuar më e vështirë, dhe kjo është në rregull,” u shpreh Trump, duke komentuar përpjekjet për një zgjidhje të qëndrueshme të konfliktit.
Në një postim në “Truth Social” të mërkurën, Trump kritikoi qëndrimin e presidentit ukrainas lidhur me Krimenë, duke e cilësuar si pengesë për procesin e negociatave. Ai theksoi se Krimea është humbur vite më parë gjatë administratës së Barack Obamës dhe, sipas tij, nuk është më temë diskutimi.
“Shpresoj që ata ta realizojnë këtë,” shtoi Trump, duke shprehur bindjen se një marrëveshje midis Rusisë dhe Ukrainës është e mundur.
