Presidenti ukrainas Volodymyr Zelensky tha sot se vendi i tij është gati për negociata të drejtpërdrejta me Rusinë, në çdo formë, pasi të hyjë në fuqi armëpushimi.
“Pas armëpushimit, ne jemi gati të ulemi në tryezën e bisedimeve në çdo formë, në mënyrë që të mos ketë rrugë pa krye”, tha Zelensky në një konferencë për shtyp.
Delegacioni ukrainas që do të takohet nesër në Londër me delegacionet e vendeve perëndimore do të ketë mandat për të diskutuar për një armëpushim të plotë ose të pjesshëm.
“Nuk do të jetë e mundur të bihet dakord për gjithçka shumë shpejt,” paralajmëroi ai, duke vënë në dukje se ka shumë çështje komplekse, si garancitë territoriale, të sigurisë dhe pranimi i Ukrainës në NATO.
Ai vuri në dukje se Ukraina nuk do ta njohë de jure pushtimin rus të Krimesë, sepse një veprim i tillë do të ishte antikushtetues.
Në lidhje me termocentralin bërthamor Zaporizhia, i cili është nën pushtimin rus, presidenti ukrainas tha se nuk ka asnjë propozim zyrtar amerikan për statusin e tij të ardhshëm.
Në bisedimet e nesërme në Londër do të marrin pjesë përfaqësues nga SHBA, Britania, Franca, Gjermania dhe Ukraina. Zëdhënësja e Departamentit të Shtetit, Tammy Bruce, tha se sekretari amerikan i shtetit nuk do të udhëtojë në Londër, por Uashingtoni do të përfaqësohet nga i dërguari special Keith Kellogg.
Zelensky tha gjithashtu se do të ishte i lumtur të takohej me presidentin amerikan Donald Trump më vonë këtë javë, kur të dy do të jenë në Itali për funeralin e Papa Françeskut.
