Fituesi i edicionit të katërt të Big Brother VIP Albania, Gjesti, është bërë emri më i përfolur në hapësirën shqiptare këto ditë – jo vetëm për fitoren e tij, por edhe për një video që ka ndezur rrjetet sociale.
Në pamjet e publikuara, Gjesti dëgjohet duke thënë: “Ju ftoj të jeni pjesë e ndeshjes së 7 qershorit ndaj Serbisë. Shihemi në stadium”. Kjo deklaratë u interpretua nga shumë media si një paralajmërim për një performancë të tij në ndeshjen Shqipëri–Serbi, që do të zhvillohet në “Arenën Kombëtare”.
Por emisioni sportiv “Favorit”, që transmetohet në T7, ka kontaktuar burime brenda Federatës Shqiptare të Futbollit (FSHF), të cilat mohojnë këto zëra.
“Emri i Gjestit nuk është diskutuar asnjëherë si opsion për të performuar në ndeshjen e 7 qershorit. Ai thjesht fton tifozët të jenë të pranishëm në stadium, nuk përmend asnjë performancë”, tha një burim zyrtar për “Favorit”.
Kujtojmë se ndeshja Shqipëri–Serbi do të luhet më 7 qershor në Tiranë, si pjesë e kualifikueseve për Kupën e Botës 2026, që do të mbahet në SHBA, Kanada dhe Meksikë.
