Federico Valverde realizoi një supergol në minutën e 93-të për t’i dhënë Real Madridit një fitore të artë 1-0 ndaj Athletic Club në “Santiago Bernabéu”. Me këtë sukses, skuadra e Ancelottit qëndron brenda katër pikëve nga Barcelona, duke mbajtur gjallë shpresat për titullin e La Ligës.
Një pjesë e parë zhgënjyese për “Los Blancos”, që u treguan të pafrytshëm në sulm. Pas afro 50 minutash pa rrezik të madh, Camavinga pati shansin e parë të vërtetë, por Unai Simon reagoi në mënyrë fantastike. Më pas, Jude Bellingham gjuajti drejt portës pas një pasimi të bukur trivela nga Vinicius Jr, por sërish portieri ishte në vend.
Dhjetë minuta para fundit, Vinicius shënoi një gol të bukur në shtyllën e afërt, por VAR-i e anuloi për pozicion jashtë loje të Endrick në ndërtimin e aksionit. Bellingham kishte dhe një tjetër mundësi ideale në fundin e ndeshjes, por gjuajti mbi traversë.
Por gjithçka u zgjidh nga Valverde, i cili shpërtheu me një vole fantastike në trekëndësh në minutën e 93-të, duke shpëtuar Realin dhe mbajtur gjallë shpresat për kampion.
