Një sfidë vendimtare për Interin zhvillohet sot në orën 18:00, ku skuadra e Simone Inzaghit përballet me Bolognën për të konsoliduar vendin e parë në renditje. E ngarkuar me angazhime në disa kompeticione, skuadra zikaltër duhet të menaxhojë me kujdes energjitë për të shmangur rënien në kthesën e fundit të sezonit. Ja kalendari i sfidave që do të përcaktojnë fatin e Interit në Serie A.
Rreziqet: Bologna, Roma dhe Lazio
Sot Interi përballet në transfertë me Bolognën, surprizën e këtij sezoni nën drejtimin e Vincenzo Italianos. Pas një jave, në San Siro mbërrin Roma, që lufton për një vend në Evropë. Një tjetër takim në shtëpi do të jetë ndaj Veronës, që po lufton për mbijetesë. Më pas, një transfertë në Torino, ndaj një skuadre që ndoshta nuk do të ketë më objektiva në kampionat. Para ndeshjes së fundit, vjen një tjetër përballje e vështirë në San Siro, ndaj Lazios, që mund të jetë ende në garë për Evropën. Më 25 maj, gjithçka mbyllet në transfertë ndaj Comos së Cesc Fabregasit.
Kalendari nuk është nga më të pamundurit për Interin, por shumëçka do të varet edhe nga ecuria në Ligën e Kampioneve. Napoli po vrapon dhe Antonio Conte e ka bërë të qartë: për ta mbajtur vendin e parë, Interit i duhet perfeksion në çdo aspekt.
Kalendari i Interit:
Bologna – Inter (20/04)
Inter – Roma (27/04)
Inter – Verona (04/05)
Torino – Inter (11/05)
Inter – Lazio (18/05)
Como – Inter (25/05)
Marotta: “Ndeshja më e rëndësishme e sezonit është ndaj Bolognës”
Presidenti dhe CEO i Interit, Giuseppe Marotta, foli për Sky Sport, duke prekur disa tema të rëndësishme për momentin aktual të skuadrës.
“Ne jemi Inter, me një histori dhe një listë suksesi. Jemi në një moment delikat, ndaj Bolognës do të luajmë ndeshjen më të rëndësishme të vitit, ku rrezikohet një pjesë e titullit. Duhet të mësohemi gjithnjë e më shumë të garojmë çdo tre ditë.”
I pyetur nëse ndalesa ndaj Bolognës mund të jetë përcaktuese:
“Ka ende shumë pikë në lojë, por do të jetë një ndeshje thelbësore, pasi përballemi me një nga skuadrat më në formë të Serie A. Ndeshja e djeshme u zhvillua me shumë sakrificë, por roli ynë na kërkon të tejkalojmë veten. Bologna është një skuadër me shumë vlera.”
