Qeveria spanjolle ka vendosur rregulla të reja për ushqimin në shkolla, me qëllim që fëmijët të ushqehen më mirë dhe të ulet rreziku i obezitetit, sidomos tek ata që vijnë nga familje me të ardhura të ulëta.
Çfarë do të ndryshojë në mensat shkollore?
Çdo ditë do të ketë fruta dhe perime të freskëta (gati gjysma prej tyre duhet të jenë sezonale).
Nuk do të lejohet më shitja e pijeve të gazuara dhe ushqimeve të pashëndetshme në makinat shitëse.
Peshku dhe orizi ose makaronat integrale duhet të shërbehen të paktën një herë në javë.
Dy herë në muaj, ushqimi duhet të jetë organik.
Ushqimet e skuqura do të lejohen vetëm një herë në javë nëse përgatiten në vend, dhe vetëm një herë në muaj nëse janë të gatshme si pica apo byrekë të tipit “empanada”.
Do të përdoret vetëm vaj ulliri ose vaj luledielli i shëndetshëm për gatim.
Sipas qeverisë, shumë shkolla nuk po ndjekin udhëzimet ushqimore. Aktualisht, mbi 70% e mensave dhe makinave shitëse nuk ofrojnë ushqime të shëndetshme.
Ministri Pablo Bustinduy tha se këto rregulla do të vlejnë për të gjitha shkollat – publike, private dhe ato të subvencionuara – duke përfshirë edhe kopshtet dhe qendrat e formimit profesional.
Në Spanjë, rreth 45% e popullsisë mbi 16 vjeç është mbipeshë ose obezë, dhe autoritetet paralajmërojnë se kjo situatë mund të përkeqësohet nëse nuk ndërhyhet që në fëmijëri.
