Kryeministri i Kosovës, Albin Kurti ka reaguar në rrjetet sociale pas dështimit të votimit në Kuvend të raportit të Komisionit për verifikimin e mandateve të zgjedhjeve të 9 shkurtit.
Kjo do të thotë se konstituimi i ri i Kuvendit të Kosovës pas zgjedhjeve dështoi të kryhej, një procedurë në dukje normale.
Për këtë Kurti ka kritikuar deputetët e PDK, LDK, AAK dhe Listës Serbe që votuan kundër konstituimit të ri të Kuvendit.
Sipas Kurtit ata kanë votuar, jo vetëm kundër qeverisë por edhe kundër vetes së tyre.
Reagimi i Kurtit në Facebook:
Deputët e opozitës PDK, LDK, Lista Serbe dhe AAK sot votuan kundër raportit të komisionit për verifikimin e mandateve. Në një votim krejt formal e teknik që bazohet në dokumentacionin e KQZ-së, ata u rebeluan kundër betimit të deputetëve dhe konstituimit të legjislaturës së nëntë. Ky është sulm brenda institucional kundër Republikës së Kosovës dhe zgjedhjeve demokratike. Kjo është situatë e paparë në shtetin tonë e shumë më gjerë. Ne qeverisim mbarë e mirë, këta lanë nam e bëjnë lajm të keq për shtetin tonë. Se janë kundër qeverisë e Republikës dihet, por se janë edhe kundër vetvetes, këtë e mësuam sot.
