Ngjarja e ndodhur në spektaklin televiziv “Big Brother VIP Albania”, ku banori Jozi Marku goditi me shuplakë Gjestin gjatë transmetimit live, ka ngjallur shqetësim të madh publik dhe mund të ketë pasoja serioze ligjore.
Sipas Kodit Penal të Shqipërisë, ky veprim përbën vepër penale.
Në bazë të Nenit 90, goditja e një personi tjetër, edhe nëse nuk lë pasoja të rënda fizike, konsiderohet akt dhune me dashje, dhe dënohet me gjobë ose me burgim deri në 2 vjet.
Fakti që incidenti ndodhi gjatë një transmetimi të drejtpërdrejtë e rrit ndjeshmërinë morale dhe sociale të çështjes.
Ndërkohë që transmetimi publik nuk e ndryshon klasifikimin penal të veprës, ai mund të ndikojë në vlerësimin e rrezikshmërisë shoqërore dhe mënyrën si do të veprojë prokuroria.
Procedimi penal për raste të tilla nis zakonisht pas kallëzimit nga viktima, por prokuroria mund të ndërhyjë edhe pa kallëzim, për shkak të ndjeshmërisë së lartë publike, siç është rasti në fjalë, që u bë viral dhe shkaktoi reagime të shumta në rrjetet sociale.
Nëse do të provohet, përmes raportit mjekësor, se viktima ka pësuar dëmtime fizike, atëherë ngjarja mund të klasifikohet më rëndë, sipas Neneve 88 ose 89, të cilat parashikojnë dënime më të ashpra se 2 vjet burgim.
Sipas raportimeve të para, Gjesti është trajtuar menjëherë pas incidentit dhe gjendja e tij është stabilizuar. Nga ana tjetër, Jozi është arrestuar nga policia në vendngjarje dhe pritet që drejtësia të ndjekë të gjitha procedurat ligjore për zbardhjen e plotë të rastit.
