Një aksident i rëndë ka ndodhur në orët e para të mëngjesit të sotëm në aksin rrugor Berat-Dimal, pranë Urës së Moravës.
Rreth orës 07:30, janë përplasur dy automjete, njëri i drejtuar nga shtetasi F. P., 31 vjeç, dhe tjetri nga shtetasi Eduart Ismaili, 50 vjeç. Përplasja ka qenë tepër e fortë, duke shkaktuar dëme të mëdha, veçanërisht në automjetin e drejtuar nga Ismaili, i cili është shkatërruar pothuajse plotësisht.
Për shkak të gjendjes së rëndë të mjetit, është dashur ndërhyrja e forcave zjarrfikëse për të nxjerrë të plagosurin nga brenda. Eduart Ismaili është transportuar menjëherë në Spitalin Rajonal të Beratit për ndihmë mjekësore, por, fatkeqësisht, nuk ka mundur t’i mbijetojë plagëve të marra dhe ka ndërruar jetë.
Grupi hetimor ndodhet në vendngjarje dhe po punon për të zbardhur shkaqet dhe rrethanat e aksidentit.
