“Bie gongu” për zgjedhjet parlamentare të 11 majit, teksa Shqipëria hap sot zyrtarisht fushatën elektorale. Gara nis me përplasje të forta mes dy kampeve të mëdha politike: Partia Socialiste kërkon mandatin e katërt radhazi me Edi Ramën në krye, ndërsa Partia Demokratike synon rikthimin në pushtet pas 12 vitesh në opozitë.
Në këtë garë, ngrihen edhe partitë e reja me ambicien për të sfiduar dominimin e PS-PD për herë të parë që prej vendosjes së pluralizmit.
Një muaj fushatë parashikohet të zhvillohet në të 12 qarqet e vendit, ku do të garohet për 140 mandatet e Kuvendit, me një formulë të re zgjedhore që përfshin 186 kandidatë për çdo subjekt politik – 46 në lista të mbyllura dhe 140 në lista të hapura.
Partia Demokratike dhe koalicioni “Aleanca për Shqipërinë Madhështore” do të jenë të parët që çelin fushatën, me një miting në sheshin “Nënë Tereza”, që pritet të nisë në orën 19:00. Kreu i PD-së, Sali Berisha, ka paralajmëruar surpriza për nisjen e fushatës, e cila do të ketë në qendër mesazhin e tij dhe të Chris LaCivita, strategut të fushatës së Donald Trump.
Ndërkohë, të shtunën në mesditë, Partia Socialiste do të hapë zyrtarisht fushatën me një tubim në sheshin “Skënderbej”, i promovuar nga kryeministri Rama si një takim festiv për projektin “Shqipëria 2030 në BE”. Përpara socialistëve, në orën 11:00, Lulzim Basha do të prezantojë nisjen e fushatës së tij nën logon e koalicionit euroatlantik.
Partia “Mundësia”, e drejtuar nga Agron Shehaj, do të hapë fushatën me një tur nga veriu në jug, duke udhëtuar me autobus të personalizuar nga Shkodra në Sarandë gjatë gjithë ditës së 12 prillit, për ta përmbyllur me një prezantim programi më 13 prill.
Ndërkohë, nisma “Shqipëria Bëhet” do të çelë fushatën në Vlorë, më 12 prill në orën 18:00, ndërsa Lëvizja “Bashkë” e Arlind Qorit do ta nisë më 13 prill në Fier.
Nga ana tjetër, “Djathtas për Zhvillim” nuk do të organizojë një aktivitet të veçantë, duke konsideruar si çelje zyrtare të fushatës aktivitetin e zhvilluar më 24 mars.
