Federata e Futbollit të Brazilit po bëhet gati që të zyrtarizojë në ditët e ardhshme emrin e trajnerit të ri të përfaqësueses së saj.
Pas dështimit dhe shkarkimit të Dorival Zhunior, brazilianët kanë kthyer sytë nga një emër i njohur në arenën ndërkombëtare, të bindur se vetëm kështu mund të bëhen përsëri fitimtarë.
Ëndrra e brazilianëve ishte Pep Guardiola ose Karlo Ançeloti, por zgjedhja e re nuk do të jetë asnjëri prej tyre.
Sipas mediave braziliane, Federata është gati t’i besojë portugezit Zhorge Zhezus drejtimin e “seleçaos” dhe meqë ka një akord parimor me trajnerin në fjalë, po bëhet gati edhe të paguajë klauzolën e largimit që ka në kontratë me klubin aktual.
Trajneri, i cili aktualisht drejton Al-Hilal në kampionatin e Arabisë Saudite, ka një klauzolë largimi prej rreth 2,5 milionë eurosh dhe federata është gati të paguajë këtë shifër dhe të ketë teknikun në drejtimin e ekipit që në muajin maj.
Por mbetet të shihet nëse Zhezus do të bindet në këtë pikë, pasi ashtu nuk do të kishte mundësi të drejtonte klubin saudit në Botërorin e Klubeve në SHBA.
