Presidenti i SHBA-së, Donald Trump beson se SHBA-ja është në rrugën e duhur pas shpalljes së tarifave gjithëpërfshirëse.
“Operacioni ka përfunduar! Pacienti ka jetuar dhe po shërohet”, shkroi Trump në platformën “Truth Social”.
Presidenti amerikan tha se “pacienti” do të ishte shumë më i fortë, më i madh, më i mirë dhe më elastik se kurrë më parë.
Bursa e Nju Jorkut nuk ra dakord, pasi Indeksi Industrial “Dow Jones” ra me 2,7% në fillim të tregtimit – në një shkallë të gjerë shitjeje.
Humbjet ishin edhe më të mëdha në bursën e teknologjisë “NASDAQ 100”, ku aksionet ranë me 3,9% në 18,828 – niveli më i ulët që nga shtatori i vitit 2024.
“NASDAQ” ka humbur 10% të vlerës , deri më tani – këtë vit.
“S&P 500” ra me 3,2% në 5,487 pikë, duke arritur gjithashtu nivelin më të ulët që nga shtatori 2024.
Trump shpalli dje në mbrëmje tarifa minimale prej 10% për shumicën e importeve në SHBA, por tarifa më të larta u vendosën për shumë vende, në varësi të deficitit të tyre tregtar.
