Kryeministri Edi Rama gjatë një takimi me mësuesit në shkollën “Besnik Sykja” në Tiranë premtoi se brenda kësaj dekade rroga mesatare e mësimdhënësve do të shkojë në 1 250 euro.
Ai tha se mësuesit meritojnë edhe më shumë, pasi puna e tyre sa vjen dhe vështirësohet. Sipas tij mësuesit nuk kanë lodhje fizike, por vështirësia e tyre është psikologjike.
“Mësuesit janë po aq të rëndësishëm sa ushtria, sepse janë një trup e cila përballjen do ta kenë më të egër. Prandaj janë një trup që duhet të mbështet dhe vlerësohet, të ngrihet në piedestal. Duhet të gjejmë rrugë dhe mënyra dhe kjo mund të behet më e lehtë nëse rrisim nivelin e dëgjimit ndaj mësuesve, që të ndjerit në mision mos jetë vetëm cështje page, por të shkojë përtej kësaj. Vështirësia në punën e mësuesve nuk shkon duke u ulur, por duke u rritur. Nuk është një vështirësi fizike, por është një vështirësi pune psikologjike. Plani ynë është që në vitet e ardhshme, brenda kësaj dekade ne pagën mesatare të mësuesve do ta çojmë 1 250 euro. Është e bëshme, nuk besoj se do të kemi problem me këtë, ndërkohë që sic foli kryetarja në detyre e bashkisë, sic foli ministrja, pjesa tjetër e përmirësimit të kushteve në shkolla shkon në favor të rritjes së dëshirës për të shkuar në punë“, tha Rama.
Pavarësisht premtimeve në fushata elektorale, shpesh mësuesit shprehin pakënaqësi për trajtimin që marrin nga qeveria. Pagat e tyre janë të pamjaftueshme për të përballuar jetesën personale dhe familjare, dhe shpesh kanë bërë thirrje për reformim në sektorin e arsimit!
