Kryetari i Partisë Demokratike, Sali Berisha, pasditen e sotme ka zhvilluar një takim me banorët e degës nr.9 në Tiranë.
Gjatë fjalës së tij, Berisha paraqiti programin e PD dhe Aleancës për Shqipërinë Madhështore.
Berisha tha se PD do tu japë përgjigjen më të mirë të gjitha problematikave të qytetarëve kudo që ndodhen.
Berisha: Ne kemi hartuar me ekspertizën më të mirë, me ekonomistët më të shquar të sotëm të SHBA-ve, Gjermanisë, mbështetjen e tyre, programin më të mirë për një Shqipëri Madhështore.
Duke u ndalur te kundërshtari i tij politik, kryeministri Edi Rama, Berisha tha se ai ka mashtruar pensionistët.
Berisha: Më në nevojë janë mbi 720 mijë pensionistë, të cilët kanë shkrirë jetën, energjitë e tyre dhe kanë një kontribut të jashtëzakonshëm në ecjen e këtij vendi, kurse tani, marrin si shpërblim një shumë krejtësisht të pamjaftueshme për jetën më modeste. Tani, ata mbetën tërësisht në mëshirën e fëmijëve të tyre, ku janë dhe ku nuk janë që t’iu dërgojnë një mbështetje, ose përndryshe nuk blejnë ilaçet, ose nuk ushqehen si duhet, ose përndryshe fëmijëve u thonë: shko, paç fatin, se këtu nuk ushqehemi dot, merr rrugët e botës.
Dhe këta nuk janë pak, janë shumë. Tjetër punë se, Edi Rama ka një armë të vetme, mashtrimin. Natyrisht, merr përpara 8 mld euro, siç kishte këtë vit, 8 mld euro, të gjitha taksat tuaja, të gjitha të mbledhura nga ajo që paguani ju, që ju merret ju në çdo blerje. Dhe në këto 8 mld la për pensionistët 16 mln euro.
Berisha premtoi se nëse PD vjen në pushtet do të bëjë shpërndarjen më të mirë të të ardhurave dhe taksave të shqiptarëve.
Berisha: Këto të ardhura që mbledhim, ne do t’i shpërndajmë me drejtësi, do t’i shpërndajmë krejt ndryshe. Me këto të ardhura që mbledhim, që janë të gjitha të qytetarëve. Se një gjë ta dini, qeveria nuk prodhon një qindarkë. Jo!
