Shkencëtarët kinezë kanë transplantuar për herë të parë mëlçinë e derrit te një njeri.
Kirurgët kanë arritur ta bëjnë të njëjtën gjë me zemrën dhe veshkat, por nuk ia kanë dalë me mëlçinë pasi është një organ më i ndërlikuar.
Shkencëtarët e Fourth Military Medical University në Kinë ndryshuan gjenet e një derri të vogël dhe transplantuan indet e mëlçisë te një njeri, truri i të cilit kishte vdekur.
Organi nuk u refuzua nga sistemi imunitar dhe funksionoi normalisht për 10 ditë derisa studimi mbaroi pas kërkesës së familjarëve të të ndjerit.
Transplantet janë zgjidhja më e mirë për pacientët që kanë mosfunksionim të mëlçisë, por u duhet të presin për një kohë të gjatë për një dhurues.
Ekspertët shpresojnë që organet e derrit të përdoren për të tejkaluar hendeqet e pritjes.
Organet e tij kanë madhësi dhe ngjashmëri gjenetike me njerëzit, por duhet që ADN-ja e tyre të ndryshohet për të parandaluar refuzimin nga sistemi imunitar.
Duke qenë se mëlçia e derrit ka përmasa më të vogla, mund të transplantohet pa e hequr mëlçinë e njeriut në mënyrë që ta ndihmojë të funksionojë.
Vitin e shkuar, shkencëtarët në Pensilvani ia dolën që të lidhnin mëlçinë e derrit te një njeri e më pas të kryhej procesi i filtrimit, por organi nuk u vendos në trup.
