Autoriteti Portual i Vlorës ka njoftuar se për shkak të kushteve të këqija të motit, udhëtimi me tragetin në linjën Vlorë-Brindisi-Vlorë do të anulohet nga e diela (23 mars) deri të hënën (24 mars) në orën 22:00. Po ashtu, lundrimi i mjeteve të vogla lundruese dhe atyre të peshkimit do të pezullohet nga data 23 deri më 25 mars.
Sipas njoftimit, “Anijet e transportit ndërkombëtar detar për pasagjerë dhe automjete në linjën Vlorë – Brindisi – Vlorë do të anullohen deri në përmirësimin e kushteve hidrometeorologjike detare, që pritet të ndodhin pas orës 22:00 të datës 24.03.2025.”
Për shkak të parashikimeve për përkeqësimin e kushteve hidrometeorologjike, nga data 23 deri më 25 mars, duke filluar nga ora 08:00 e datës 23 mars, do të mbizotërojnë erëra me forcë deri në 8-9 bft dhe shpejtësi deri në 25-40 m/s, me dallgë që mund të arrijnë deri në 4.50 metra.
Në këtë kuadër, kërkohet bashkëpunimi i të gjitha subjekteve që operojnë në fushën e detarisë për të marrë masa të nevojshme për sigurimin e mjeteve në port dhe rritjen e gatishmërisë së ekuipazhit.
- Ndalohen pajisjet me leje-nisje të mjeteve të vogla lundruese dhe ato të peshkimit, të cilat operojnë në det të hapur, duke filluar nga ora 06:00 e datës 23.03.2025.
- Të gjithë drejtuesit e mjeteve të vogla lundruese dhe anijeve të peshkimit që operojnë brenda dhe jashtë gjirit të Vlorës, duhet të marrin parasysh kushtet hidrometeorologjike dhe të marrin masat e nevojshme për sigurimin e mjeteve.
- Anijet e transportit ndërkombëtar për pasagjerë dhe automjete në linjën Vlorë – Brindisi – Vlorë do të anullohen deri në përmirësimin e kushteve hidrometeorologjike, pas orës 22:00 të datës 24.03.2025.
- Përmirësimi i kushteve hidrometeorologjike për mjetet e vogla lundruese dhe ato të peshkimit pritet të ndodhi pas orës 08:00 të datës 25.03.2025.
